وروستی
د افغانستان اسلامي جمهوري دولت پلاوي د هندوستان هېواد د کرنې، کليو او پراختیا ملي بانک له استازو سره وليدل
د اقليمي بدلون په هکله د ملګرو ملتونو کنوانسيون UNFCCC د غړو هېوادونو پنځمه ويشتم کنفرانس (COP25) په لړ کې د افغانستان اسلامي جمهوري دولت پلاوي د هندوستان هېواد د کرنې، کليو او پراختیا ملي بانک (NABARD) له استازو سره وليدل.
په پيل کې د دې بانک استازو د اقليمي بدلون د اغېزو پر وړاندې د انعطاف پذيرۍ، د ګلخانه یي ګازونو د انتشار د اندازې د کمښت او د اقليمي بدلون مالي نړیوالو ميکانيزمونو ته د لاسرسي په هکله بحث وکړ او د اقليمي بدلون مالي نړیوالو ميکانيزمونو ته د لاسرسۍ په برخه کې يې د چاپېريال ساتنې ملي ادارې له فعاليتونو څخه مننه وکړه.
ورپسې د افغانستان اسلامي جمهوري دولت په استازيتوب د چاپېريال ساتنې ملي ادارې د پاليسۍ او نړيوالو اړيکو معين، ادريس مليار د سازګارۍ صندوق (AF) لپاره د ملي تطبيق کوونکي بنسټ (NIE) د رامنځته کولو په موخه د دې دواړو بنستونو فعاليتونو ته د لاسرسي په اړه خبرې وکړې او ويې ويل: دا دواړه بنسټونه بايد په هېواد کې د شته بنسټونو په هکله د مطالعې او د سازګارۍ صندوق لپاره د يو تطبيق کوونکي بنسټ په توګه د يو نوي بنسټ د معرفي کېدو په اړه کار وکړي او پايلې يې د يوې مياشتې څخه مخکې د چاپېريال ساتنې ملي ادارې سره شريکې کړي.