د چاپېریال ساتنې عمومي ادارې ولایتي کارکوونکو ته د ظرفیت لوړونې یو ورځنی ښوونیز پروګرام جوړ شو

۱۴۴۸کال د صفرالمظفر ۵مه نېټه/ کابل

د چاپېریال ساتنې عمومي ادارې د اقلیمي بدلون ریاست له لوري نن دوشنبه د ۱۴۰۵کال د چنګاښ په ۲۹مه نېټه د دې ادارې د بند امیر غونډو په تالار کې د ۳۴ولایتونو د چاپېریال ساتنې ریاستونو د اقلیمي بدلون کارپوهانو ته د "اقلیم بدلون مختلفو موضوعاتو" په هکله یو ورځنی روزنیز پروګرام جوړ شو.

په دې روزنیز پروګرام کې به د متخصصینو او کارپوهانو له لوري د هر اړخیز معلوماتي پرزنټېشنونو له لارې د اقلیمي بدلون اساساتو، اقلیمي بدلون حکومتولۍ، د ګلخانه‌یي ګازو د خپرویدو کچې راکمولو او سازښت، د اقلیمي بدلون زیانونو د ارزونې کړنلارو او د اقلیمي بدلون اړوند راپور جوړونې د څرنګوالي په تړاو ګډونوالو ته معلومات ورکړل شي.

غونډه د قران عظیم الشان مبارکو ایتونو په تلاوت پیل شوه ورپسې د چاپېریال ساتنې ادارې عمومي رئیس الحاج مولوي مطیع الحق خالص د اقلیمي بدون ستونزو او ننګونو په هکله وینا وکړه او په خپلو خبرو کې یې وویل: اقلیمي بدلون یو نړۍوال ګواښ چې افغانستان یې هم له ناوړه اغېزو څخه زیانمن شوی؛ زموږ هېوادوال ځکه له اقلیمي بدلون څخه ډیر زیانمن دي چې ډیری خلک په کرنه او مالدارۍ بوخت دي.

ښاغلي خالص زیاته کړه چې موږ ټول باید د اقلیمي بدلون موجوده ستونزو د حل لپاره په ګډه کار او عملي اقدامات وکړ؛ ترڅو مخکې قدمونه واخلو.

عمومي رئیس له ګډونوالو غوښتنه وکړه چې په دې روزنیز پروګرام کې چې کوم معلومات ترلاسه کوي باید په خپلو ورځنیو کارونو کې ترې په عملي توګه ګټه واخلي. ده کارپوهانو ته سپارښتنه وکړه چې د اقلیمي بدلون په تړاو خپل معلومات زیات کړي او په ولایتونو کې په دې برخه کې موجوده ستونزې، ګواښونه او ننګونې له مرکز سره شریکې کړي؛ ترڅو په ملي پلانونو او برنامو کې د اقلیمي بدلون اړوند موضوعات شامل شي.

عمومي رئیس ګډونوالو ته سپارښتنه وکړه چې په لږو امکاناتو باید ډیر کار وکړو، ګډه همکاري او همغږي ولرو، د بیت المال له امکاناتو څخه باید ناوړه ګټه پورته نه کړو او په پوره اخلاص سره خپلې دندې ترسره او خپلو کارونو ته متوجه و اوسو.

ورپسې ګډونوالو خپل نظرونه، ستونزې او وړاندیزونه له عمومي رئیس سره شریک کړل او د مقام لخوا ورته د همکارۍ ډاډ ورکړل شو.

د غونډې په لړ کې د متخصصینو لخوا د اقلیمي بدلون ولایتي کارکوونکو ته  " د اقلیمي بدلون اساساتو، اقلیمي بدلون حکومتولۍ، د ګلخانه‌یي ګازو د خپرویدو کچې راکمولو او سازښت، د اقلیمي بدلون زیانونو د ارزونې کړنلارو او د اقلیمي بدلون اړوند راپور جوړونې د څرنګوالي په تړاو هر اړخیز معلوماتي پرزنټېشنونه وړاندې شول.

Jul 21, 2026