وروستی
د ستراتیژیک مدیریت په تړاو دوه ورځنی ورکشاپ ترسره شو
کابل ۱۴۰۰ کال د وري ۷مه
د چاپېریال ساتنې ملي ادارې لسګونو کارکوونکو ته د یادې ادارې د سلاکارانو له لوري د ستراتیژیک مدیریت په تړاو دوه ورځنی ښوونیز ورکشاپ تر سره شو.
په پيل کې د چاپېریال ساتنې ملي ادارې مسلکي معین انجنیر عزت الله صدیقي ګډونوالو ته د ښه راغلاست تر څنګ زیاته کړه: مدیریت د ژوند د ټولو چارو لپاره ارزښتمن توک دی او ټول باید د مدیریت له زده کړې برخمن و اوسئ، ده همدا راز ستراتیژیک مدیریت د ژوند په چارو کې اهم توک وباله او له ګډونوالو یې غوښتنه وکړه چې د ستراتیژیک مدیریت له دغه ښوونیز ورکشاپ پوره ګټه واخلي او شته فرصتونه له لاسه ورنکړي.
ده همدا راز وویل چې ستاسو کار له مدیریتي مسایلو سره تړښت لري؛ نو هڅه وکړئ چې زده یې کړئ او په خپلو چارو کې ورڅخه ګټه واخلئ. ښاغلي صدیقي په مدیریتي برخه کې د دې ته ورته ورکشاپونو ترسره کول ګټور و بلل او زیاته یې کړه چې په راتلونکې کې دې ته ورته ښوونیز ورکشاپونه ترسره شي.
د یاد ورکشاپ په دویمه برخه کې د دغه ادارې د مشاورینو له لوري له ګډونوالو سره ښوونیز معلوماتي پرېزنټېشنونه شریک شول او د ګډونوالو پوښتنو ته ځوابونه ورکړل شول.
د یاد ورکشاپ په پای کې د چاپېریال ساتنې ملي ادارې د مالي او اداري چارو معین محمد یوسف حمیدیان د ستراتیژیک مدیریت په اړه خبرې وکړې، د یاد ورکشاپ جوړول یې نوی ابتکار یاد کړ او زیاته یې کړه چې کله ستراتیژي موجوده وي، لرې نه ده چې نوښت دې رامنځته نه شي، ده د یاد ورکشاپ له ګډونوالو غوښتنه وکړه چې له یاد ورکشاپ پوره ګټه واخلي او په خپلو چارو کې نوښتونه رامنځته کړي. ده همدار راز زیاته کړه چې د ادارې رهبري د دې ته ورته برنامو او ورکشاپونو بشپړ ملاتړ کوي.
|هېره دې نه وي چې د یاد ورکشاپ په اوږدو کې د دغه ورکشاپ ګډونوالو ته ستاینلیکونه هم ووېشل شول.