وروستی
د بسل، روټرډام او سټاکهلم کنوانسیونو غړو هېوادونو انلاین کنفرانس ترسره شو
د زمري ۱۰مه کابل
د بسل، روټرډام او سټاکهلم درې ګونو نړیوالو کنوانسیونو اړوند د 2021 کال اړوند غونډې د پینځو ورځو لپاره د روان کال (2021) د جولای میاشتې له 26مې تر 30مې نېټې پورې په انلاین توګه ترسره شوې.
د بسل کنوانسیون په پنځلسم کنفرانس او د روټرډام او سټاکهلم په لسم کنفرانس کې د افغانستان د استازو په شمول د غړو هېوادونو ۱۲۰۰ تنو د نړیوالو سازمانونو او مدني ټولنو استازو ګډون کړی وو.
افغان پلاوي د چاپېریال ساتنې ملي ادارې د پلان، پالیسۍ او نظارت معین ډاکټر احمد حسیب پایاب په مشرۍ په یاد کنفرانس کې برخه اخیستې وه چې په هغه کې د کرنې، تجارت او صنعت، مخابراتو، کورنیو چارو وزارتونو او کابل پوهنتون استازو ګډون کړی وو.
د دې کنفرانس د جوړیدو موخه دا وه چې په سالمه توګه د کیمیاوي زبالو مدیریت وشي او همدا راز یاد کنوانسیونونه په سمه توګه تطبیق او د کوویډ-۱۹ له ناوړه اغېزو څخه انساني ټولني وژغورل شي.
هر کال د خطرناکو کیماوي زبالو او کوويډ-۱۹ وبا له امله ۳میلیونه انسانان مري، چې یادو تلفاتو ته په کتو اړینه ده؛ ترڅو خطرناکه کیمیاوي زبالې په سالمه توګه مدیریت شي؛ نو په همدې تړاو په دغه کنفرانس کې کلیدي بحثونه او ځېنې مهمه پرېکړې وشوې چې په هغه کې د بسل، روټرډام او سټاکهلم کنوانسیونونو د 2022 کال د بودیجې منظوري او د نړیوالو چاپېریالي اسانتیاوو لپاره د خطرناکه کیمیاوي زبالو د مدیریت په موخه د لازمو سلا مشورو ورکول شامل و.
د یادونې وړ ده چې د بسل، روټرډام او سټاکهلم کنوانسیونونو غړو هېوادونو کنفرانس به د ۲۰۲۲ کال د جون په میاشت کې په حضوري بڼه جوړ شي.