وروستی
په افغانستان کې د ناروې سفیر د چاپېریال ساتنې ملي ادارې له عمومي رئیس سره وکتل
۱۴۴۵کال د ربیع الثاني ۱۷مه/ کابل
د چاپېریال ساتنې ملي ادارې عمومي رئیس حافظ عزیز الرحمن نن د ۱۴۰۲کال د لړم په
۱۰مه نېټه په خپل کاري دفتر کې د ناروې له سفیر پاول کلومن بیکین (Paul Klouman Bekken) سره لیدنه وکړه.
په پیل کې د دې ادارې عمومې رئیس د ناروې
سفیر او ورسره پلاوي ته ښه راغلاست ووایه او د مختلفو چاپېریالي موضوعاتو په ځانګړي
ډول د اقلیمي بدلون په تړاو یې ورسره هر اړخیزې خبرې وکړې.
د چاپېریال ساتنې ملي ادارې عمومي رئیس وویل: نړۍوال باید چاپېریالي موضوعات سیاسي
نه کړي ځکه دا بشري موضوعات دي چې ګټه او زیان یې یوازې ولسونو ته رسیږي؛
افغانستان اوسمهال په جدي توګه له اقلیمي بدلون څخه اغېزمن هېواد دی په داسې حال کې
چې د ګلخانهيي ګازونو په خپرولو کې ډیره کمه ونډه لري.
نوموړي ټینګار وکړ چې ملګري ملتونه د افغانستان د اقلیمي بدلون پروژې چې د ۸۲۶ میلیونو
ډالرو په ارزښت دي باید له تعلیق څخه و باسي؛ په نړۍوالو چاپېریالي غونډو کې د دې
ادارې مسوولینو ته د ګډون زمینه برابره شي او همدا راز د COP په راتلونکې
غونډه کې افغانستان ته هم د ګډون بلنه ورکړل شي.
ښاغلي حافظ وویل اوسمهال په افغانستان کې بشپړ امنیت تامین دی او د کار کولو لپاره
ښه فرصت رامنځته شوی؛ نو له نړۍوالو مو هیله ده چې له افغانستان سره خپلو مرستو ته
دوام ورکړي.
په افغانستان کې د ناروې سفیر د دې ادارې له عمومي رئیس څخه مننه وکړه او زیاته یې
کړه چې هڅه به وکړي چې له افغانستان سره د نړۍوالو د همکارۍ زمینه مساعده کړي او ډاډ
یې ورکړ چې کډ کار کولو ته ژمن یو.
نوموړي وویل: موږ تلاش کوو چې نړۍوال له افغانستان سره ښه تعامل وکړي، ده زیاته کړه:
موږ به د نیمګړو چاپېریالي پروژ د بیا پیل او اقلیمي بدلون سره د مبارزې په برخه کې
خپلې هڅې جاري وساتو؛ ځکه له اقلیمي بدلون سره مبارزه د ټولې نړۍ ګډ کار دی.