د چاپېریال ساتنې ملي ادارې عمومي رئیس او د اکبر موسسې مسوول د چاپېریالي مسایلو په تړاو خبرې وکړې

۱۴۴۶کال د شوال ۹مه نېټه/ کابل
د چاپېریال ساتنې ملي ادارې عمومي رئیس مولوي مطیع الحق خالص نن دوشنبه د ۱۴۰۴کال د وري په ۱۸مه نېټه په خپل کاري دفتر کې د اکبر مؤسسې له مسوول نمیک حیدروف سره د افغانستان د چاپېریالي وضعیت په تړاو بحث او خبرې وکړې.
په دې غونډې کې چې د دې ادارې د اقلیمي بدلون، نړۍوالو اړیکو او پلان رئیسانو هم حضور درلوده، د یو شمېر مهمو چاپېریالي مسایلو په اړه هر اړخیز بحث او خبرې وشوې.
د چاپېریال ساتنې ملي ادارې عمومي رئیس د اکبر مؤسسې رئیس ته ښه راغلاست ووایه او مننه یې ترې وکړه چې چاپېریالي موضوعاتو ته پاملرنه کوي. د اکبر مؤسسې رئیس نمیک حیدروف چاپېریالي مسایل او اقلیمي بدلون خورا مهم موضوعات وبلل او ټینګار یې وکړ چې په دې برخه کې باید زیات کار وشي؛ ترڅو د اقلیمي بدلون سره د مبارزې په برخه کې له نړۍوالو مالي سرچینو څخه مرستې را جلب شي.
د چاپېریال ساتنې ملي ادارې عمومي رئیس مولوي مطیع الحق خالص په خپلو خبرو کې وویل افغانستان د اقلیمي بدلون څخه تر ټولو زیات اغېزمن شوی هېواد دی چې د څېړنو او کره معلوماتو راټولولو په برخه کې د ادارې، ملي او نړۍوالو مؤسسو لخوا ګډ کار ته اړتیا ده.

نوموړي څرګنده کړه: د نړۍوالو لخوا د اسلامي امارت په راتګ سره د ۹۰۰میلیونو ډالرو په ارزښت چاپېریالي پروژې ځنډول شوي وې چې له نېکه مرغه شپږ پروژې له تعلیق څخه ويستل شوي او پر پاته نورو پروژو هم کار روان دی.
عمومي رئیس د اذربایجان هېواد څخه مننه وکړه چې د (COP29) کنفرانس کې یې ورته د ګډون بلنه ورکړه. ښاغلي خالص وویل موږ به په ټولو نړۍوالو کنفرانسونو کې د افغانستان چاپېریالي ستونزې شریکوو او هڅه به کوو څو نړۍوال پر دې قانع کړو چې د افغانستان تعلیق شوې پروژې بېرته پیل او تطبیق کړي.
د چاپېریال ساتنې ملي ادارې عمومي رئیس د اکبر مؤسسې له مسوول څخه غوښتنه وکړه چې ټولې مؤسسې د چاپېریال ساتنې ملي ادارې سره همغږې کړې؛ ترڅو چټک قدمونه واخیستل شي. ده همدا راز ټینګار وکړ چې ملي او نړۍوالې ادارې او بنسټونه دې په (COP30) کنفرانس کې د افغانستان پلاوي د ګډون زمینه برابره کړي؛ ترڅو د افغانستان چاپېریالي ستونزې تر نړۍوالو ورسېږي.

Apr 7, 2025