وروستی
پکتیا کې د سویل ختیځ زون په کچه د ملي مشارکت دریم سند جوړیدو په هکله مشورتي غونډه وشوه
۱۴۴۷ کال د صفر ۲۷مه/پکتیا
د چاپیریال ساتنې ملي ادارې له لوري ګردیز کې د سویل ختیځ زون په سطح په ملي کچه د
ټاکل شوې ونډې دریم سند جوړیدو په هکله مشورتي غونډه وشوه چې پکې د پکتیا، لوگر،
پکتیکا او خوست ولایتونو د مختلفو امارتي ادارو استازو گډون کړی وو.
غونډه د قرٱنکریم مبارکو ایتونو په تلاوت پیل شوه ورپسې د پکتیا ولایت د چاپیریال
ساتنې رئیس مولوي عبدالهادي هدایت پرانستونکې وینا وکړه او د چاپیریال ساتنې په تړاو
یې خبرې وکړې.
نوموړي وویل چې زموږ او تاسو هڅه داده چې سالم چاپیریال رامنځته کړو او که چیرې طبیعت
سالم وي نو د ټولو ژونديو موجوداتو سلامتیا ورسره تضمین کیدی شي او که چیرې طبیعت
خراب شي د ژوندیو موجوداتو ژوند ورسره خرابیږي.
ښاغلي هدایت وویل چې زموږ ټول صنعتي فعالیتونه باید معیاري وي او که چیرې معیاري
نه وي نو ژوند ته مستقیم تهدید دی، هغه وویل چې پرمختگ باید په سالمه طریقه وي او
د انسانانو او نورور ژوندیو موجوداتو ژوند و نه ګواښل شي.
هغه زیاته کړه چې اوس خوشبختانه د چاپیریال ساتنې ملي اداره ټول هغه فعالیتونه په
روزانه توگه څاري؛ ترڅو محیط زیستي عناصرو ته زیان و نه رسيږي او صنعتي فعالیتونه
د چاپیریالساتنې جواز له اخیستلو څخه وروسته خپل فعالیتونه پیلوي. ده همداراز له
گډونوالو څخه وغوښتل چې له دې فرصت څخه باید گټه پورته کړي او د دې ورکشاپ مواد او
پیغامونه باید نورو ته ورسوي، ترڅو چې د عامه پوهاوي کچه لوړه شي.
د غونډې په لړ کې د اجنډا مطابق د کارپوهانو لخوا مسلکي پریزنتیشنونه وړاندې شول.