وروستی
د هېواد د چاپېریالي وضعیت ارزونې راپور جوړولو او NDC-3 په تړاو د مرکزي زون دوه ورځنی ورکشاپ پرانیستل شو
١٤٤٧کال د ربیع الاول ١٦مه/ کابل
د هېواد د چاپېریالي وضعیت ارزونې راپور جوړولو او د ملي ټاکل
شوي ونډي درېیم پړاو (NDC-3) په تړاو
دوه ورځنی ورکشاپ په کابل کې د یو لړ ځانګړو مراسمو په ترڅ کې پرانیستل شو.
په دې مراسمو کې د چاپېریال ساتنې ملي ادارې پالیسي او
مسلکي مرستیال ډاکټر ملا زینالعابدین عابد، د رها موسسې رهبرۍ، د مرکزي زون اړوند
سکتوري ادارو استازو، د نړیوالو مرستندویه بنسټونو او موسسو مسؤلینو ګډون کړی و.
ورکشاپ د قرآن کریم د مبارکو آیتونو په تلاوت پیل شو، د رها
موسسې رئیس محمد یوسف حمیدیان د ورکشاپ د ښه راغلاست وینا وکړه او د یاد ورکشاپ د
جوړېدو موخې یې تشریح کړې.
وروسته د چاپېریال ساتنې ملي ادارې پالیسي او مسلکي مرستیال
ښاغلي ډاکټر عابد هر اړخیزه وینا وکړه. نوموړي د هېواد د چاپېریالي وضعیت ارزونې
راپور جوړولو، د NDC-3 د
اهمیت، د اقلیمي بدلون منفي اغېزو، په هېواد کې د اساسي او بنسټیزو پروژو د تطبیق،
د امنیت ټینګښت او یو شمېر نورو اړوندو موضوعاتو په اړه تفصیلي څرګندونې وکړې.
ده وويل دا مهال په هېواد کې بشپړ امنیت تأمین دی، نړیوال
همکاره بنسټونه دي اساسي او بنیادي پروژې عملي کړي، دا ځکه چې افغانستان د ٤٥ کلنې
جګړې څخه راوتلی او دمګړی په ټولو برخو کې کار کولو ته اړتیا لیدل کیږي.
د چاپېریال ساتنې ملي ادارې مرستیال زیاته کړه افغانستان په
نړۍوالو کچه د اقلیمي بدلون د منفي پایلو قرباني دی او نړیوال باید په دې برخه کې
خپل مسؤلیت ادا کړي.
تر ویناوو وروسته د ورکشاپ مسلکي برخه پیل شوه، چې پکې د
متخصصینو له لوري تخنیکي پرزنټېشنونه وړاندې شول. د دغو پرزنټېشنونو موخه د اقلیمي
بدلون د اغېزو، د چاپېریال ساتنې نړیوالو تعهداتو، د ملي پروژو پر وړاندې د چاپېریالي
ننګونو او د راتلونکي لپاره د مناسب پلان جوړونې اړخونه روښانه کول وو.
یاد ورکشاپ د ګډونوالو لپاره د نظریاتو او تجربو د شریکولو یوه
مهمه علمي او تخنیکي زمینه برابره کړه، څو د هېواد د چاپېریالي وضعیت ارزونې راپور
او د NDC-3 سند
د چمتو کولو په برخه کې ور څخه کار واخیستل شي.