وروستی
د چاپېریال ساتنې ملي ادارې رهبرۍ د EPTDO موسسې د روانو او راتلونکو پروژو جاج واخیست
١٤٤٧کال د شعبان ٥مه/ کابل
د چاپېریال ساتنې ملي ادارې عمومي رئیس مولوي مطیعالحق خالص
او د ادارې مالي او اداري مرستيال مولوي سعدالدین سعید د یوه پلاوي په ملتیا د EPTDO موسسې له مسوولینو سره وکتل او
د یادې موسسې د تېرو، روانو او راتلونکو پروژو هر اړخیز جاج یې واخیست.
یاده کتنه د EPTDO موسسې
په مرکزي دفتر کې ترسره شوه، په پیل کې د دې موسسې رئیس عبدالهادي اڅکزي د
معلوماتي پرزنټېشن له لارې د موسسې د فعالیتونو، لاسته راوړنو او پلان شوو پروژو
په اړه تفصیلي معلومات وړاندې کړل.
نوموړي د EPTDO موسسې
د پروژو موخې، تطبیقي بهیر، جغرافیایي پوښښ او د چاپېریال ساتنې په برخه کې د یادو
پروژو اغېزې تشریح کړې او ډاډ یې ورکړ چې موسسه هڅه کوي خپلې چارې د ملي اړتیاوو
او د هېواد د چاپېریالي لومړیتوبونو سره سمې عیارې کړي او پر مخ وړي.
ورپسې د چاپېریال ساتنې ملي ادارې عمومي رئیس مولوي مطیعالحق
خالص د خپلو څرګندونو پر مهال ټینګار وکړ چې د چاپېریال ساتنې په برخه کې د هرې
پروژې تطبیق باید د ادارې د ټاکل شوو پالیسيو او لومړیتوبونو په رڼا کې ترسره شي.
نوموړي زیاته کړه چې پروژې باید ولس ته پر رښتینې، دوامدارې او اغېزمن خدمترسونې
متمرکزې وي او عملي پایلې ولري.
عمومي رئیس همداراز د شفافیت، همغږۍ، حسابورکونې او مسلکي تګلارو
پر رعایت ټینګار وکړ او ویې ویل چې د چاپېریال ساتنې ملي اداره د هغو بنسټونو ملاتړ
کوي چې خپلې پروژې د هېواد د چاپېریال ساتنې له ملي اهدافو سره سم تطبیقوي.
په دې ناسته کې د ادارې مالي او اداري مرستيال مولوي سعدالدین
سعید هم د خپلي وینا پر مهال د دوامدارو همکاریو، ګډو همغږیو او د چاپېریال ساتنې
په برخه کې د اغېزمنو پروژو د تطبیق پر ارزښت ټینګار وکړ او دا ډول ناستې یې د اړیکو
او فعالیتونو د لا پیاوړتیا لپاره ګټورې وبللې.