وروستی
د میدان وردګو ولایت د چاپېریال ساتنې رئیس د ملګرو ملتونو د مرکزي زون له استازو سره وکتل
۱۴۴۷ کال د ذوالحجې ۲۹نېټه/ میدان وردګ
د میدان وردګو ولایت د چاپېریال ساتنې رئیس مولوي الله محمد
ذاکر نن دوشنبه د ۱۴۰۵کال د غبرګولي په ۲۵مه نېټه د ملګرو ملتونو د مرکزي زون له
استازو هر یو ډاکتر محمد قاسم یعقوبي، اسدالله زمري او عالم ګیر رازق سره په خپل
کاري دفتر کې وکتل .
په دې ناسته کې د
اقلیمي بدلون له امله د رامنځته شویو ننګونو، د وچکالۍ د اغېزو، د طبیعي سرچینو د
ساتنې، د ځنګلونو او څړځایونو د خوندیتوب، د اوبو سرچینو د مدیریت او د چاپېریالي
مسایلو په هکله د پوهاوي د پراختیا په اړه بحث او خبرې وشوې. د میدان وردګو ولایت د چاپېریال ساتنې رئیس د یاد
ولایت د چاپېریالي وضعیت، موجوده ستونزو او د خلکو د پوهاوي کچې د لوړولو لپاره
ترسره شوي فعالیتونه د ملګرو ملتونو له استازو سره شریک کړل.
د اجنډا سره سم د ملګرو ملتونو استازو د چاپېریال ساتنې ریاست
له هڅو څخه مننه وکړه او د اقلیمي بدلون د اغېزو راکمولو، د چاپېریالي پروګرامونو
د پیاوړتیا او د عامه پوهاوي د پراختیا په برخه کې یې پر ګډو همکاریو ټینګار وکړ
او ژمنه یې وکړه چې په نېږدې راتلونکي کې به د اقلیمي بدلون او چاپېریالي ننګونو
په اړه د میدان وردګو ولایت په کچه یوه ګډه تخنیکي او مشورتي غونډه جوړه کړي؛ ترڅو
د ستونزو د حل لپاره اغېزمنې او عملي لارې چارې ولټول شي.
د یادونې وړ ده چې د غونډې په پای کې دواړو لوریو د اقلیمي
بدلون پر وړاندې د ګډې مبارزې، د طبیعي سرچینو د ساتنې، د چاپېریالي ارزښتونو د
ترویج او دوامدار پرمختګ د موخو د تحقق لپاره د همغږۍ او همکاریو پر پراختیا هوکړه
وکړه.