د چاپېریال ساتنې ادارې عمومي رئیس په مشرۍ د دې ادارې له ولایتي رئیسانو سره انلاین غونډه وشوه

 ۱۴۴۸کال د محرم۲۱مه/ کابل

د چاپېریال ساتنې ادارې عمومي رئیس مولوي مطیع الحق خالص په مشرۍ نن دوشنبه د ۱۴۰۵کال د چنګاښ په ۱۶مه نېټه د دې ادارې د بند امیر غونډو په تالار کې انلاین مشورتي غونډه ترسره شوه چې پکې د دې ادارې مرکزي او ولایتي رئیسانو حضور درلوده.

غونډه د قران عظیم الشان مبارکو آیتونو په تلاوت پیل شوه ورپسې د چاپېریال ساتنې ادارې عمومي رئیس مولوي مطیع الحق خالص ګډونوالو ته ښه راغلاست ووایه او د سږني کال د نیالګیو کېنولو کمپاین پر څرنګوالي، د اقلیمي بدلون پر وړاندې د مبارزې، دهمغږۍ پر پیاوړتیا، موجوده ستونزو، خنډونو د له منځه‌وړلو او ولایتي ریاستونو د فعالیتونو د لا اغېزمنتیا په اړه یې هر اړخیزې خبرې وکړې.

عمومي رئیس ولایتي رئیسانو ته سپارښتنې وکړې چې د هېواد د زرغونتیا لپاره دې د راتلونکي کال نیالګیو کېنولو کمپاین د پراختیا او په منظم ډول تطبیق په پار دې له اړوندو امارتي ادارو، خصوصي سکتور، ملي او نړۍوالو مؤسسو سره همغږي پیاوړې کړي؛ ترڅو مخکې قدمونه واخلي.

ښاغلي خالص له ګډونوالو غوښتنه وکړه چې د سږني کال د نیالګیو کېنولو ملي کمپاین پر وړاندې موجوده ستونزو او خنډونو ته په کتو باید راتلونکي کال کې یادې ستونزې له منځه یووړل شي او د هېواد د سمسورتیا لپاره باید د سږکال په پرتله ډیر نیالګي کېنول شي. ده همداراز مسوولینو ته سپارښتنه وکړه چې په ټولو ولایتونو کې باید د نیالګیو کېنولو لپاره وړ او مناسب ځایونه (غرونه او غونډۍ) په نښه شي چې راتلونکي کال کې پکې نیالګي کېنول شي.

عمومي رئیس ډاډ ورکړ چې د ولایتي رئیسانو او کارکوونکو د ظرفیت لوړونې، مسلکي ودې او د کاري وړتیاوو د پیاوړتیا لپاره به روزنیز او تخنیکي پروګرامونه جوړ شي، ترڅو د چاپېریال ساتنې خدمتونه لا معیاري او اغېزمن شي.

د غونډې په وروستۍ برخه کې ولایتي رئیسانو خپلې ستونزې، وړاندیزونه او نظرونه شریک کړل او د خپلو ولایتونو موجوده ستونزو په هکله یې معلومات وړاندې کړل. عمومي رئیس د دوی د نظریاتو او وړاندیزونو له اورېدو وروسته ډاډ څرګند کړ چې د مطرح شویو ستونزو د حل، د ولایتي ریاستونو د ملاتړ او د ادارې د فعالیتونو د لا ښه والي لپاره به لازم او عملي اقدامات ترسره شي.

Jul 11, 2026