د انرژۍ له کمښت سره د مبارزې او اقلیمي بدلون پر وړاندې د مقابلې په اړه له ښکېلو لورو سره مشورتي ورکشاپ تر سره شو

۱۴۴۸ کال د صفرالمظفر ١٤مه / کابل

د چاپېریال ساتنې عمومي ادارې له لوري د کلیو پرمختیا (ROM) مؤسسې په همکارۍ نن چهارشنبه، د ۱۴۰۵ کال د زمري په ٧مه نېټه (په افغانستان کې د انرژۍ له کمښت سره د مبارزې او اقلیمي بدلون پر وړاندې د مقابلې په اړه له ښکېلو لورو سره یو ورځنی مشورتي ورکشاپ تر سره شو) چې پکې د اړوندو امارتي ادارو، ملي او نړیوالو مؤسسو، پوهنتونونو استادانو او متخصصینو ګډون کړی وو.

غونډه د قران کریم مبارکو آیتونو په تلاوت پیل شوه ورپسې د د کلیو پرمختیا مؤسسې رئیس محمد رياض رامين د ګډونوالو هرکلی وکړ، د خپلو فعالیتونو او د یاد ورکشاپ د موخو په هکله یې خبرې وکړې.

د چاپېریال ساتنې ادارې عمومي رئیس الحاج مولوي مطیع‌الحق خالص د افغانستان د چاپېریالي وضعیت، د اقلیمي بدلون او تېرو لسیزو تپل شوو جګړو ناخوالو او ناوړه اغېزو په هکله خبرې وکړې او زیاته یې کړه چې افغانستان لپاره یوازې اقلیمي بدلون مسئله نه ده بلکې د تېرو لسیزو تپل شوو جګړو، په تېر کې د یوه حاکم او مشروع نظام نشتون له امله د افغانستان طبیعي منابع، ځنګلونه، کرنې او مالدارۍ سکتور، اوبو سرچينې ډيرې زیانمنې شوې دي چې بيا احياء او جبران يې ډير کار او هڅو  ته اړتیا لري.

نوموړي همدارنګه د هواککړتیا د اضرارو په هکله وینا وکړه او ويې ويل چې د هواککړتیا نه یوازې په انسانانو بلکې د ټولو موجوداتو پر ژوندانه ناوړه اغیزې کوي.

عمومي رئیس ټینګار وکړ چې د چاپېریالي ستونزو د حل لپاره باید ملت او حکومت په ګډه کار وکړي؛ موږ باید د ژوندانه ټول اړخونه منظم کړو؛ ترڅو سالم چاپېریال ولرو. د چاپېریالي موضوعاتو په اړه د خلکو د عامه پوهاوي کچې په لوړولو کې باید ټول خپل مسوولیتونه ادا کړو، خصوصا علمي بنسټونه او علمای کرام باید دې برخې ته پاملرنه وکړي.

ښاغلي خالص پر امارتي ادارو او مؤسسو غږ وکړ چې پخپلو پلانونو او پروژو کې چاپېریالي اصولو او لومړيتوبونو ته جدي پاملرنه وکړي.

د ورکشاپ په لړ کې د اړوندو امارتي ادارو، پوهنتونونو استادانو او متخصصینو له خوا هر اړخیز معلوماتي پریزنټیشنونه وړاندې شول، ګډونوالو خپل نظرونه، پوښتنې او وړاندیزونه له مسوولینو سره شریک کړل او هر اړخیز بحث پرې وشو.

Jul 30, 2026